سلاح عبثي ومش وطني

الكاتب: رشيـد حمـدان

بدون تزويق وبالفلسطيني يعني بالله عليك انت يا بطل الأبطال ويا قائد يا مغوار ويا ابن الشعب الجبار لما مسكت السلاح وطخيت عالسما .. ولما صوت رصاصك كان زي صوت قبقاب غوار .. استعراض وهمرجات .. وعضلات منفوخة بأبر وحبوب ومرسومة بشحبار. معلش أسألك : بالله عليك كنت فرحان لما طخيت على الفضاء ولما أرعبت بطيشك أطفال ؟ ومثلا حسيت إنك حررت أرضنا؟ ولا مبسوط لما خزقت غيمة. صلينا بالجوامع صلاة الاستسقاء عشان تتجمع بسمانا وتروي زرعنا؟ يا ابن الحلال زمان كانوا يغنوا ( يا فدائي خلي رصاصك صايب ) وانت يخزي العين عنك وصلاة النبي عليك قناص ونظرك ستة على ستة صوبت وصبت سلك الضغط العالي ونزل على الي كانوا بدهم يحضنوا صاحبهم الأسير المحرر من الأسر وحضنتهم الكهربا بفضلك . بشرفك بس خبرني عن شعورك لما حولت الفرح لميتم!!! أستحلفك بكل إشي خلقه الله.. شو ممكن تحكي لإم الأسير اللي كانت تزغرد وفرحانة لحرية ابنها اللي طلع من سجن الاحتلال بعد كل هاي السنين وانت حرمتها من فرحتها لإنك قتلت إبن جارتها؟؟ بالله عليك شو بدك تقول لإم الشهيد الي راح يحتفل بتحرير الأسير وما رجعلها عشان حضرتك حبيت تستعرض عضلات اللي مشغلك عضلنجي عنده؟ وشو امك بدها تجاوب إمه لما تشوفها بعد دفن ابنها وتسألها : متذكرة واحنا صغار كانوا يقولولنا النبي وصىٰ على سابع جار؟؟ بشرفك بهاي الظروف اللي بنعيشها مش لو حطيت حق الرصاصات اللي طخيتهن عالسما بظرف وأعطيتهن لعيلة مستورة مش كان عشيت فيهن طفل أبوه مش لاقي لقمة خبز بدل ما تتسبب بوفاة شب طالع من صلاة المغرب عشان شوية زعرنة واستهتار؟؟ رصاص عبثي وطايش وبقتل الناس حتى وهمي قاعدين بأمان جوا الدار .. رصاص جبان ومش وطني وممكن يتسبب بموت شباب وصبايا وكبار وصغار .. ورصاص رح يصيب الوطن ولو ما انحطله حد أكيد رح يجيبلنا العار. لإيمتى بدنا نستحمل هاي الظاهرة ولإيمتى بدنا نسكت عن هاي الفئة الضالة وهي معروفة، وكل طفل بالبلد بعرف من هي. لازم نحط إيدنا بإيدين بعض وتبذل كل الجهود ولازم نقرر نرجع نحب بعض زي ما كنا زمان، ولازم نتذكر إنه السلاح بإيد الولد بجرح ولازم نتذكر إنه السلاح العبثي مش وطني.